Martxan da ‘Uda Giro’, Durangoko udako programa kulturala
Udan zehar Durangoko kaleetan kultur ekintza anitzak, kalitatezkoak, eta doakoak eskaintzeko helburuarekin San Agustin Kultur Guneak eta Plateruena Kafe Antzokiak “Uda Giro” ekimena jarri dute martxan. Oferta hau “Uda Kalean Bizi” eta “Jazzeruena” programa kulturalen arteko fusioari esker sortu da.
“Uda Giro” ekainaren 27 eta uztailaren 21 artean egingo da eta guztira, doako 8 ikuskizunez osaturik egongo da, besteak beste: antzerkia, zinema, dantza eta musika. Orokorrean, kontzertuak Plateruenako terrazan ospatuko dira eta gainerako ekintzak, aldiz, Durangoko parke desberdinetan.
Beste batzuen artean, nabarmentzekoa da Udako zinema sesioa, non “Handia” pelikula emitituko den. 2017an 10 Goya sari eskuratu zituen pelikula honek, tartean Eneko Sagardoy durangarraren aktore berri onenaren saria. Sesioa, Benita Uribarrena parkean izango da.