‘Pasioa’ Durangora itzuliko da pandemiaren ondorioz bi urteko geldialdiaren ostean
Pasioaren XXVII. edizioa aurkezteko asmoz, Juan de Iciar kultur elkarteko ordezkariek, Pasioko partaideek eta Durangoko Udaleko arduradunek prentsaurrekoa eskaini dute Durangoko udaletxean. Izan ere, pandemiaren ondorioz bi urteko geldialdiaren ondoren, kultur ordezkaritza Santa Ana plazara itzuliko da apirilaren 13, 14 eta 15ean.
“Bi urte oso gogorren ondoren, non gizartearen eremuak aldatu eta mugatu eta jarduera kulturalak murriztu diren, ‘Durangoko Pasioa’ ahalegin eta ilusio handiz berreskuratzen dugu. Ziurgabetasunez betetako hilabeteak izan dira, pandemiaren eraginez ez baitugu argi izan antzezlana behar besteko bermeekin gauzatu ahal izango zen ala ez”, azaldu dute Pasioko ordezkariek.
Ildo horretan, Juan de Iciar elkarteko ordezkariek eskerrak eman nahi izan dizkiote Durangoko Udalari antzezlana aurrera eramateko emandako laguntzagatik. Era berean, eskerrak eman dizkiete Bizkaiko Foru Aldundiko Kultura Sailari, enpresa babesleei eta eragile laguntzaileei. Azkenik, antzezpenean parte hartuko duten pertsona guztiak eskertu nahi izan dituzte, bai abendutik gidoiarekin lanean ari direnei, bai herriari forma emango dioten aktoreei.
Aurten, nobedade gisa, Markel Ganboa eta Sheila Ceide aktoreak izango dira Jesus eta Mariaren paperak antzeztuko dituztenak. Markelek eta Sheilak paper ezberdinak antzeztu dituzte antzezpenean urte luzez, eta aurten Jesus eta Maria antzezteko erronka handia onartu dute. Era berean, Markos Etxartek lehen aldiz arituko da zuzendari bezala, hainbat urtez rol desberdinetan aritu ondoren. «Etorkizuneko apustua egin dugu, ziur baikaude pertsona gazteenak direla Durangoko Pasioari jarraipena emateko ekimena hartu behar dutenak», azaldu dute Pasioko kideek.
Ziurgabetasuna eta ilusioa
Iazko urrian kideak rol nagusiak adosten hasi ziren, eta urtarrilean gidoiak irakurtzeari ekin zioten, pandemiaren bilakaera oraindik argi ez zegoenean. Hilabete hauetan ziurgabetasunak eta ilusioak talka egin dute momento askotan.
Zentzu horretan, Ima Garrastatxu alkateak eta Julian Ríos alkateordeak eskerrak eman dizkiete Juan de Iciar elkarteko kideei, Durango kultur erreferentzia bihurtzeko egiten duen lanagatik. “Bi urteko geldialdi behartuaren ondoren, Durangok Pasioa berreskuratuko du berriro, eta, horrekin batera, Santa Ana plazaraino hurbilduko diren ehunka persona jasoko ditu gure herriak. Guretzat oso garrantzitsua da kaleko xarma eta alaitasun hori berreskuratzea, eta lan horretan behar-beharrezkoak ditugu herriko elkarteak. Horregatik, Pasioa berreskuratzea albiste bikaina da Durangorentzat”.
Apirilaren 6an, asteazken honetan, Pasioko kideek azken entsegua egingo dute plazan, emanaldien asteari ekin aurretik. Hori dela eta, antolatzaileek Santa Anara gerturatzeko deia egin diete antzezpena ezagutu edo parte hartu nahi duten herritar guztiei, bertan herri gisa parte har dezaten. «Pertsona guztiek dute lekua plazan», azpimarratu dute.
Azkenik, asteazkena 13, osteguna 14 edo ostirala 15ean Santa Ana plazan 21:00etan eskainiko diren emanaldietara joateko gonbitea luzatu diete herritarrei.
